Манастир Св.вмч.Георгиј Победоносец (VI век)
Манастирот Св.вмч.Георгиј Победоносец во с.Туденце се наоѓа на локалитетот Црквиште - Бучало и претставува најстарата трикорабна ранохристијанска базилика во Македонија (втора половина на VI век). Возобновена е на патрониот празник Ѓурѓовден на Мај 2012 година.
Старите темели на црквата се откриени на ден 07.02.2004 година, кога на сега покојниот Тихомир Крстевски на сон му се јавил светецот Ѓорѓи Победоносец, кој му рекол „сите ме газите, а никому не текнува да ме открие. Да појдеш, да ме откопаш и да ме осветиш“, посочувајќи му точно на кое место се наоѓа храмот. Тихомир почнал да копа и на длабочина од половина метар ги пронашол ѕидовите на некогашниот храм во пределот на олтарот. Подоцна му се придружиле и други жители на Туденце и под надзор на Музејот на тетовскиот крај, по речиси еден месец работа локалитетот бил расчистен. И Според професорот Виктор Лилчиќ, црквата потекнува од втората половина на VI век.
Црквата има два влеза, големиот кој е и главен на западната страна и малиот на јужниот дел. Откриена е мермерна пластика во олтарот. Манастирот е изградена на старите темели врз основа на проект изработен од Благоја Стојковски, виш конзерватор во Националниот конзерваторски центар.
Историја
Во полошкиот регион се откриени 16 базилики, меѓу кои и базиликата во Туденце.
Базиликата во Туденце, како што споменавме, е најстарата ранохристијанска базилика во Македонија.
Се работи за развиен ранохристијански епископски центар. ваквото тврдење се поткрепува со постоење на крстилница во базиликата, како и фактот што само епископите имале право да изведуваат церемонии на покрстување на паганите во христијанството и да простуваат.
Во олтарниот дел на базиликата се пронајдени коскени остатоци, кои потекнуваат од епископ или пак од црковен великодостојник, што го потврдува фактот дека се работи за епископски центар.
Епископските центри во V и VI век имале статус на град, што може да се заклучи од Закон донесен од царот Зенон (474-475 и 476-491), кој изрично наредува да секој град има свој епископ.
Овие епископи ја имале сета власт во градовите: црковна, судска, административна, фискална воена итн.
Ваква базилика е пронајдена и утврдена во село Стенче (Општина Брвеница), во локалитетот Градиште со две базилики, три крстилници и цистерна.
Галерија
